Cando penso que te fuches,
negra sombra que me asombras,
ó pé dos meus cabezais
tornas facéndome mofa.
Cando imaxino que es ida,
no mesmo sol te me amostras,
e eres a estrela que brila,
e eres o vento que zoa.
Se cantan, és ti quen cantas,
se choran, és ti quen choras,
e és o marmurio do río
e és a noite, e és a aurora.
En todo estás e ti és todo,
pra min e en min mesma moras,
nin me deixarás ti nunca,
sombra que sempre me asombras
nin me deixarás ti nunca,
sombra que sempre me asombras...
Rosalia de Castro - Negra Sombra ( Te la dedico )
No hay comentarios:
Publicar un comentario